MiqbasMiqbas
قانوني

سياسة الخصوصية

سارية من 9 أكتوبر 2026.

مقباس من صنع مقباس، شركة ناشئة مستقلة من السعودية. تواصل معنا: ⁦support@miqbas.xyz⁩.

حسابك

تدخل بإيميل ⁦Gmail⁩ أو بديسكورد. كلمة سرّك تنحفظ مشفّرة، وما أحد يقدر يقراها حتى إحنا، والموقع يمنع التخمين المتكرر. وتقدر تفعّل التحقق بخطوتين من صفحة حسابك. وإن دخلت بإيميلك، فإيميلك يبقى في موقع مقباس ولا يصل خادمه.

نصوص الألعاب والذكاء الاصطناعي

الترجمة يسويها الذكاء الاصطناعي، فممكن تغلط، وتقدر تصحّح أي سطر. الترجمة عبر الإنترنت ترسل نص اللعبة لخدمة الذكاء الاصطناعي اللي اخترتها بمفتاحك أنت، والترجمة على جهازك ما ترسل شي. ومفاتيحك تبقى مشفّرة في جهازك.

الترجمات المشتركة

اللي تترجمه يروح لخادم مقباس، عشان اللاعب الجاي في نفس اللعبة يستفيد منه، وأنت تستفيد من ترجمات غيرك. وهذا جزء من طريقة شغل مقباس.

بلاغات الأعطال

لما يصير عطل، مقباس يرسل سجلاته لخادمنا مربوطة بحسابك، عشان نصلحه ونتواصل معك. واسمك في ويندوز ومفاتيحك وملفاتك الثانية ما تنرسل أبدًا.

الاستعمال والجهاز

يرسل مقباس لخادمنا رقم نسخته، وبصمة مشفّرة لجهازك ما نقدر نعرف منها شي عن جهازك، وكم وقت استعملته. نستعملها لعدّ المستخدمين، ولمنع اللي يخالف الشروط. ويردّ الخادم إن كان حسابك أو جهازك موقوفًا، أو كانت نسختك موقّفة حتى تحدّثها، ومعه رسائل صاحب مقباس لك.

رسائل الدعم

الرسالة اللي ترسلها من صفحة الدعم توصل مع إيميلك لقناة فريق مقباس الخاصة في ديسكورد، عشان نرد عليك بالإيميل.

الأطفال

مقباس للاعبين عمومًا، ومو مصنوع للأطفال. الدخول يحتاج حساب ⁦Gmail⁩ أو ديسكورد، والاثنين لمن عمره 13 سنة أو أكثر (أو أقل عمر مسموح في بلده). ما نجمع عن قصد أي معلومات شخصية من أطفال تحت 13 سنة، ونسعى نلتزم بقوانين حماية الأطفال والخصوصية اللي تنطبق علينا، ومنها ⁦COPPA⁩. داخل البرنامج ما أحد يسولف مع ذكاء اصطناعي، هو يترجم نصوص اللعبة بس. والمساعد اللي يرد على الأسئلة في سيرفر ديسكورد حقنا ذكاء اصطناعي، مو إنسان. والشتائم في الترجمة تتلطّف، والألعاب اللي فيها محتوى جنسي نرفضها. لو تظن إن طفل تحت 13 استعمل مقباس، راسلنا على ⁦support@miqbas.xyz⁩ ونحذف بيانات حسابه.

خياراتك

لو تبغى نحذف بياناتك من خادمنا، راسلنا على ⁦support@miqbas.xyz⁩ أو في ديسكورد. وبلاغات الأعطال والترجمات المشتركة جزء من طريقة شغل مقباس، فلو ما توافق عليها لا تستعمل مقباس.